手指個傷口已經好得七七八八,而呢牌畫滴滴仔正傳畫得好順,已經有D存稿,而且D故仔亦有D草稿諗定好,所以呢牌好有幹勁,0岩0岩上星期睇左S8驚世檔案,自已好鍾意,因為佢比倒我有80年代睇科幻片0既感覺,無依家果D新科幻片用得0甘多電腦特技,但佢個劇情令你睇得好有趣味,好實在,當電腦特技太氾濫而睇番套反撲歸真0既電影,反而鈎起好多以前睇戲0既感覺,而呢D感覺係依家D電影比唔倒我,未睇快D去睇啦!!

星期四係我揸cutter生涯裡面第一次嚴重地介親手指,傷口有半吋長,而且幾深,好彩0既係我處理得快,唔算流左好多血就止左血,依家只要傷口唔再爆,我諗應該約一個星期倒會好,不過我地呢行成日揸cutter介0野,其實只要一個唔小心0既話就好易瀨0野,呢次真係血光之災,唯有下次再小心D,Ha Ha.......

好耐無畫應節漫畫,心血來潮今回應一應節,希望大家端午節快樂,食多幾隻糉!!

最近三聯出版社將羅冠樵先生畫0既西遊記漫畫輯錄成精裝合訂本上,中,下3冊,可能你會問羅冠樵先生係邊位,但如果你同我差唔多年紀0既話,你就好大機會睇過佢0既漫畫,因我諗我果個年代,無0羊邊個細路無睇過兒童樂園0瓜,就算唔係期期追都總會睇過朋友買果一兩本,而羅冠樵先生就係兒童樂園其中一位漫畫師,佢嚮兒童樂園工作超過30年,作品無數,較令人深刻有西遊記及小圓圓,為童書奉獻近半生,其實呢份精神已值得專敬,想重温0既朋友可去買0黎收藏! (順帶一提,下冊因印刷時頁數出現問題,已全面回收,修正後會再發行)

今個星期又試胃痛,希望只係個別事件,唔係長期都係0甘,一陣就出去睇魔盜王前傳,希望會好睇,不過我系Johnny Depp Fans,點都入場睇,聽講第五集劇本已寫好,只係爭Johnny想唔想拍,所有有錢搵0既電影,片商就梗要佢繼續生金蛋啦!!